» १०० औं दिनमा शोकाकुल सप्तरी

मधेसी मोर्चाका कार्यकर्ता र प्रहरीबीच झडप हुँदा प्रहरीको गोलीले दुईजना आन्दोलनकारीको शनिबार राति मृत्यु भएको छ । झडपका क्रममा ३० भन्दा बढी आन्दोलनकारी र २५ भन्दा बढी प्रहरी घाइते भएका छन् । मधेशी मोर्चाले थप दुई जनाको मृत्यु भएको दाबी गरे पनि पुष्टि भएको छैन ।

प्रहरीले स्कर्टिङ गरी सवारी साधनलाई गन्तव्यमा पुर्‍याउने काममा अवरोध भएपछि झडप भएको हो । पूर्वपश्चिम राजमार्गअन्तर्गत सप्तरीको भारदह र रुपनीमा एक–एक जनाको ज्यान गएको हो । भारदहमा डाढा, ७ का २० बर्षीय वीरेन्द्र राम र रुपनीमा जमुनीमधेपुरा, ९ का २५ बर्षीय नागेश्वर यादवको प्रहरीको गोलीले मृत्यु भएको हो ।

झडपक्रममा प्रहरीको गोलीले अरु दुईजनाको मृत्यु भएको दाबी गर्दै संघीय समाजबादी फोरम नेपालका केन्द्रिय सदस्य शम्भु झाले शब प्रहरीले नै लगेको समेत दाबी गरे । भारदहमा १८ आन्दोलनकारी घाइते भएका हुन् । गम्भीर अवस्थाका ९ जनालाई धरान लगिएको छ । ३५ बर्षीय राजेश यादव, २५ बर्षीय श्रबणकुमार झा, १५ बर्षीय मोहम्मद अक्तर, ५५ बर्षीय रघु साफी, ३० बर्षीय सुरेन्द्र यादव, ४० बर्षका रामेश्वर मण्डल र ४० बर्षीय लाल झालाई उपचारका लागि धरान लगिएको प्रहरी उपरीक्षक भीमप्रसाद ढकालले बताए ।

रुपनीमा भएको झडपमा ४६ बर्षका सत्रुघन राय, ५० का रामचन्द्र यादव र ३५ बर्षीय भुवनेश्वर मण्डललाई पनि उपचारका लागि धरान पठाइएको छ । मृतक र अधिकांश घाइतेहरुको पेट, छाती र टाउकोमा गोली लागेको चिकित्सकले बताएका छन् ।